កម្ពុជាជាប់ចំណាត់ថ្នាក់លេខ ០៣ ក្នុងចំណោមប្រទេស១៦៦ ស្តីពីការគ្រប់គ្រងការឆ្លងរាលដាល និងការគ្រប់គ្រងផលប៉ះពាល់នៃវីរុសកូវីដ-១៩

ភ្នំពេញ៖ ថ្ងៃទី២០ ខែវិច្ឆិកា ឆ្នាំ២០២០ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានថ្លែងប្រាប់ប្រភពព័ត៌មានថា “ខ្ញុំសូមចូលរួមអបអរសាទរចំពោះចំណាត់ដ៏ល្អរបស់កម្ពុជា នៅក្នុងការគ្រប់គ្រងការឆ្លងរាលដាល និងផលប៉ះពាល់នៃវីរុសកូវីដ-១៩ ប៉ុន្តែសូមរម្លឹកដល់ប្រជាពលរដ្ឋកម្ពុជាទាំងអស់ មិនត្រូវធ្វេសប្រហែសជាដាច់ខាត និងត្រូវតែយកចិត្តទុកដាក់បង្កើនការប្រុងប្រយ័ត្នទ្វេដង”។

លោកស្រីបានសង្កត់ធ្ងន់ថា តាមការផ្សព្វផ្សាយរបស់ ការិយាល័យចក្ខុវិស័យសេដ្ឋកិច្ច នៃប្រទេសសេណេហ្គាល់ កម្ពុជាជាប់ចំណាត់ថ្នាក់លេខ ០៣ នៅក្នុងចំណោមប្រទេសចំនួន ១៦៦ នៅលើពិភពលោក ហើយកម្ពុជាមានចំណាត់ថ្នាក់ល្អជាងគេនៅអាស៊ី ស្តីពីការគ្រប់គ្រងការឆ្លងរាលដាល និងការគ្រប់គ្រងផលប៉ះពាល់នៃវីរុសកូវីដ-១៩ បានយ៉ាងល្អ ពិតមែន ប៉ុន្តែយើងមិនត្រូវធ្វេសប្រហែសជាដាច់ខាត និងត្រូវតែយកចិត្តទុកដាក់បង្កើនការប្រុងប្រយ័ត្នទ្វេដង ព្រោះថាជំងឺកូវីដ-១៩ នៅបន្តមានសន្ទុះនៃការឆ្លងរាលដាល ទាំងកម្រិតពិភពលោក ទាំងកម្រិតប្រទេសនៅអាស៊ាន ពុំទាន់ថមថយនៅឡើយទេ។ លោកស្រីបានបន្ថែមថា៖ “ការវាយតម្លៃនេះជារឿងល្អ ហើយក៏បានឆ្លុះបញ្ចាំងពីការខិតខំប្រឹងប្រែងរបស់កម្ពុជា ក្នុងការទប់ស្កាត់ការរីករាលដាល នៃវីរុសកូវីដ-១៩ បានដោយជោគជ័យផងដែរ”។

កាលពីថ្ងៃទី១៥ ខែវិច្ឆិកា ឆ្នាំ២០២០ ការិយាល័យចក្ខុវិស័យសេដ្ឋកិច្ច នៃប្រទេសសេណេហ្គាល់បានវាយតម្លៃចំណាត់ថ្នាក់កម្ពុជាជាប់លេខ ០៣ ដោយចំណាត់ថ្នាក់លេខ ០១ បានទៅលើប្រទេស Saint Kitts and Nevis ដោយឡែកចំណាត់ថ្នាក់ចុងក្រោយគេ គឺប្រទេសអេស្ប៉ាញ ដោយវាយតម្លៃទៅលើស្ថានភាពនៃការឆ្លង ការជាសះស្បើយ និងអត្រាមរណៈ៕

Loading...