កម្លាំងចម្រុះរបស់អាជ្ញាធរនៃរាជធានីភ្នំពេញ នៅតែមមាញឹកចុះជួយពលរដ្ឋ

(ភ្នំពេញ) ៖ កម្លាំងចម្រុះក្នុងរាជធានីភ្នំពេញ រួមមាន អាជ្ញាធរ, កងរាជអាវុធហត្ថ, កងនគរបាល, កងអង្គរក្ស, កងពលតូចថ្មើរជើងលេខ៧០ នៅតែមមាញឹកគ្រប់ពេលវេលា ចេញប្រតិបត្តិការជួយសង្គ្រោះប្រជាពលរដ្ឋ ដែលកំពុងរងគ្រោះ ដោយទឹកជំនន់ភ្លៀងគ្រប់គោលដៅ ។ ជាក់ស្តែងនៅថ្ងៃទី១៥ ខែតុលា ឆ្នាំ2020នេះ កម្ពស់ទឹកស្ទឹងព្រែកត្នោត នៅតែបន្តឡើងខ្ពស់ និង ជនលិចដល់ សង្កាត់ចំនួន៦ ក្នុងខណ្ឌដង្កោ រាជធានីភ្នំពេញ ។

នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស បានបញ្ជាដោយម៉ឹងម៉ាត់ដល់ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស មេបញ្ជាការកងរាជអាវុធហត្ថរាជធានីភ្នំពេញ និងជាប្រធាន ក្រុមការងាររាជរដ្ឋាភិបាល ចុះមូលដ្ឋាន ខណ្ឌដង្កោ ឲ្យដឹកនាំកម្លាំងចូលរួមសហការជាមួយកម្លាំង ចម្រុះគ្រប់ប្រភេទ ធ្វើយ៉ាងណាជួយប្រជាពលរដ្ឋឲ្យបានជាអតិបរិមា ។

គិតតាំងពីថ្ងៃទី១៤ខែតុលាឆ្នាំ២០២០ រហូតដល់ ម៉ោងនេះ ពោលពេញ១ថ្ងៃទី១៥តុលានេះ លោកឧត្តមសេនីយ៍ឯក រ័ត្ន ស៊្រាង បានអនុវត្តបទបញ្ជារបស់លោកនាយឧត្តមសេនីយ៍ សៅ សុខា ដោយដឹកនាំបញ្ជាកម្លាំងកងរាជអាវុធហត្ថរាជធានីភ្នំពេញដោយផ្ទាល់ និងមានការចូលរួមពីក្រុមអូប័ររបស់ កងរាជអាវុធហត្ថលើផ្ទៃប្រទេស ចុះតាមគោលដៅរងគ្រោះ សង្គ្រោះពលរដ្ឋយ៉ាងមមាញឹកបំផុត។

ជាក់ស្តែងកាលពីថ្ងៃទី១៤តុលា លោកឧត្តមសេនីយ៍ឯក រ័ត្ន ស៊្រាង បានឈរជើងដឹកនាំបញ្ជាកម្លាំងពេញមួយថ្ងៃ នៅតំបន់ផ្លូវសណ្តរស្ទឹង សង្កាត់គងនយ និង សង្កាត់រលួស លុះយប់ឡើងលោកបានបន្តទៅឈរជើង នៅតំបន់ផ្សារព្រែកជ្រៃ សង្កាត់ស្ពានថ្ម ពេញមួយយប់រហូតដល់ម៉ោង ៥ភ្លឺ ទើបបន្តទៅឈរជើង នៅតំបន់លិចទឹកសង្កាត់ព្រែកកំពឹសដើម្បីដឹកនាំកម្លាំងច្រកការ៉ុងខ្សាច់ទប់ទឹកកុំឲ្យច្រោះដីដាច់ផ្លូវ រហូតដល់ពេលថ្ងៃត្រង់នេះ៕

Loading...