គណៈកម្មការអន្តរក្រសួង សិក្ខាសាលាពិគ្រោះយោបល់លើសេចក្តីព្រាងបឋមផែនការមេ សម្រាប់ការអភិវឌ្ឍវិស័យទេសចរណ៍ខេត្តមណ្ឌលគិរី

(មណ្ឌលគិរី)៖ លោក ថោង ខុន រដ្ឋមន្ត្រីក្រសួងទេសចរណ៍ ជាប្រធានគណៈកម្មការអន្តរក្រសួង បានអញ្ជើញជាអធិបតីក្នុងពិធីបើកសិក្ខាសាលាពិគ្រោះយោបល់លើសេចក្តីព្រាងបឋមផែនការមេសម្រាប់ការអភិវឌ្ឍវិស័យទេសចរណ៍ខេត្តមណ្ឌលគិរី​ កាលពីថ្ងៃទី១០ ខែសីហា ឆ្នាំ២០២០ ដោយធ្វើយ៉ាងណាឱ្យវិស័យទេសចរណ៍នៅក្នុងខេត្តនេះ អាចទាក់ទាញបានភ្ញៀវទេសចរកាន់តែច្រើនជាងមុនបន្ថែមទៀត ដើម្បីរួមចំណែកក្នុងការទ្រទ្រង់កំណើនសេដ្ឋកិច្ច-សង្គម និងបង្កើតការងារផងដែរ។

លោករដ្ឋមន្ត្រី ថោង ខុន និងលោកអភិបាលខេត្តមណ្ឌលគិរី ដំណាងស្ថាប័នពាក់ព័ន្ធ​ មន្ទីរជំនាញក្នុងអង្គសិក្ខាសាលានេះបានយកចិត្តទុកដាក់ផ្តល់យោបល់ទៅលើចំណុចសំខាន់ៗដូចជា៖ ការកំណត់ចក្ខុវិស័យអភិវឌ្ឍ​​វិស័យទេសចរណ៍ខេត្តមណ្ឌលគិរី, ការកំណត់តំបន់អាទិភាព (Zoning) សម្រាប់ការអភិវឌ្ឍវិស័យទេសចរណ៍, ការកំណត់ទិសដៅយុទ្ធសាស្ត្រ​អាទិភាពសំខាន់ៗ និងការកំណត់យន្តការស្ថាប័នអនុវត្តផែនការមេ។ល។

ថ្លែងក្នុងឱកាសនោះ លោករដ្ឋមន្តី ថោង ខុន បានផ្តល់យោបល់បន្ថែមលើសេចក្តីព្រាងបឋមផែនការមេសម្រាប់ការអភិវឌ្ឍវិស័យទេសចរណ៍ខេត្តមណ្ឌលគិរី រួមមាន៖

* ទី១៖ ការអភិវឌ្ឍវិស័យទេសចរណ៍ខេត្តមណ្ឌលគិរី ត្រូវតែគោរពទៅតាមអភិក្រមនៃការអភិវឌ្ឍប្រកបដោយនិរន្តរភាព និងការទទួលខុសត្រូវ «ការអភិវឌ្ឍបម្រើការអភិរក្ស និងការអភិរក្សទ្រទ្រង់ដល់ការអភិវឌ្ឍ» ដើម្បីបានជាប្រយោជន៍សេដ្ឋកិច្ចសង្គម និងប្រជាពលរដ្ឋមូលដ្ឋានរួមចំណែកដល់ការថែរក្សាការពារ និងអភិរក្សធនធានធម្មជាតិ និងបេតិកភណ្ឌវប្បធម៌ ពិសេសរក្សាបាននូវអត្តសញ្ញាណដើមរបស់ខេត្តមណ្ឌលគិរី។

*ទី២៖ ការអភិវឌ្ឍត្រូវតែឆ្លើយតបទៅនឹងចក្ខុវិស័យនៃការអភិវឌ្ឍជាតិ ឆ្នាំ២០២០-២០៣៥ និងបណ្តាឆ្នាំខាងមុខ ដោយផ្អែកលើស្ថានភាពបច្ចុប្បន្ន និងការប្តេជ្ញាចិត្តរបស់រាជរដ្ឋាភិបាល។

* ទី៣៖ កំណត់វិសាលភាពនៃសកម្មភាពវិនិយោគ-អភិវឌ្ឍនៅតំបន់ដែនជម្រកសត្វព្រៃទាំង៥ (ដែនជម្រកសត្វព្រៃភ្នំព្រេច ណាមលៀរ លំផាត់ កែវសីមា និងស្រែពក) និងរបៀងទេសចរណ៍វប្បធម៌ និងអេកូទេសចរណ៍ ប៊ូស្រា-ដាក់ដាំ ដោយលើកទឹកចិត្តឲ្យមានការអភិវឌ្ឍតែសកម្មភាពអេកូទេសចរណ៍ និងទេសចរណ៍ធម្មជាតិ ភ្ជាប់ជាមួយទេសចរណ៍វប្បធម៌ជនជាតិដើមភាគតិចពិសេស គប្បីជំរុញលើកទឹកចិត្ត ពង្រឹងវិស័យសហគមន៍​ទេសចរណ៍ឱ្យបានល្អ និងមានប្រសិទ្ធភាព។

* ទី៤៖ អាជ្ញាធរខេត្តគ្រប់សមត្ថកិច្ចគ្រប់កម្រិត និងជំនាញ ត្រូវអនុវត្តឲ្យបានខ្ជាប់ខ្ជួនម៉ឺងម៉ាត់ជាដាច់ខាតតាមបទបញ្ជារបស់ប្រមុខរាជរដ្ឋាភិបាល ក្នុងការទប់ស្កាត់ការទន្ទ្រានដីរដ្ឋ ដីព្រៃជាកម្មសិទ្ធិឯកជន។

* ទី៥៖ ធ្វើការការចុះបញ្ជីរមណីយដ្ឋានទេសចរណ៍សំខាន់ៗក្នុងខេត្តឱ្យបានរួសរាន់ដើម្បីធានានិរន្តរភាព និងប្រសិទ្ធភាពនៃការប្រើប្រាស់ និងអភិវឌ្ឍតំបន់ទាំងអស់នេះ។

រដ្ឋមន្ត្រី ក្រសួងទេសចរណ៍ បានរំលឹកដល់រដ្ឋបាលខេត្តត្រូវបន្តអនុវត្តវិធានសុវវត្ថិភាពទេសចរណ៍ឲ្យបានត្រឹមត្រូវតាមការណែនាំ​របស់ក្រសួងសុខាភិបាល និងក្រសួងទេសចរណ៍ឲ្យបានម៉ឺងម៉ាត់ ពិសេសក្នុងខណៈដែលទេសចរក្នុងស្រុកកំពុងតែមានការរីកចំរើន​ ហើយខាងមុខនេះនៅពេលដែលឈប់សម្រាករយៈពេលវែងត្រូវយកចិត្តទុកដាក់ឲ្យបានខ្ពស់បំផុត​ និងផ្តល់សេវាទេសចរណ៍ប្រកបដោយគុណភាព និងអនាម័យ ៕

Loading...