ចងកសម្លាប់ខ្លួន ព្រោះតែមានវិបត្តិស្នេហ៍ធ្ងន់ធ្ងរ បានបន្សល់ទុកកូនចំនួន៣នាក់អោយនៅកំព្រា

ខេត្តតាកែវ៖ ហេតុការណ៍នេះ​បង្ករអោយមានការភ្ញាក់ផ្អើលនៅល្ងាច​ថ្ងៃទី២៦ ខែមករា ឆ្នាំ២០១៨ម្សិលមិញនេះ នៅភូមិ​ផ្សារ​តា​កោរ សង្កាត់រ​ការ​ក្នុង ក្រុង​ដូន​កែវ ខេត្តតាកែវ។

ជនរងគ្រោះ គឺអ្នកស្រី ចេ​វ សុ​វ​ឌ្ឍ​នា អាយុ៣៦ឆ្នាំជា​មន្ត្រី​បម្រើការ​នៅ​ក្នុងរដ្ឋសភា ហើយក៏​ជា​សមាជិក​មួយរូប​នៅក្នុង​ក្រុមយុវជន​គណបក្ស​ប្រជាជន​កម្ពុជា​លើ​ការងារ​ពង្រីក​ចលនា​យុវជន​នៅក្រៅ​ប្រទេស​ផងដែរ។

មូលហេតុ​ដែល​នាំ​ឲ្យ​ស្ត្រី​រូបនេះ​ចងក​សម្លាប់ខ្លួន​បន្សល់​ទុក​ឲ្យកូន៣នាក់​ឲ្យ​នៅ​កំព្រា​មិនទាន់មាន​ការអះអាង​ឲ្យ​ច្បាស់លាស់​នោះទេ តែ​សមត្ថកិច្ច​សង្ស័យ​មាន​វិបត្តិ​ស្នេហា។

លោក​អធិការ​ក្រុង​ដូន​កែវក៏​មិន​បានដឹង​ពី​មូលហេតុ​ច្បាស់លាស់នៃ​ការធ្វើអត្តឃាត​នេះដែរ ប៉ុន្តែ​ក្នុង​បន្ទប់​ធ្វើអត្តឃាត​សមត្ថកិច្ច​បាន​រកឃើញ​សំបុត្រ​មួយច្បាប់​រៀបរាប់​ពី​វិបត្តិ​ស្នេហា ដែល​នាំ​ឲ្យ​សមត្ថកិច្ច​សន្និដ្ឋានថា ការធ្វើអត្តឃាត​នេះ​បណ្តាលមកពី​វិបត្តិ​ស្នេហា ឬ ស្នេហា​ត្រីកោណ​ជាដើម។

យោងតាម​ប្រភពពី​សមត្ថកិច្ច​ក្រុង​ដូន​កែវ បាន​អះអាងថា អ្នកស្រី ចេ​វ សុ​វ​ឌ្ឍ​នា មានកូន៣នាក់​បច្ចុប្បន្ន​កំពុងស្នាក់នៅ​ជាមួយ​ជីដូន​ក្នុង រាជធានី​ភ្នំពេញ។ បច្ចុប្បន្ន​គេ​ក៏​មិនដែល​ឃើញ​អ្នកស្រី​ទៅណា​មក​ណា​ជាមួយ​ស្វាមី​នោះដែរ ជាហេតុ​នាំ​ឲ្យ​មានការ​សន្និដ្ឋានថា អ្នកស្រី សុ​វ​ឌ្ឍ​នា ជា​ស្ត្រី​មេម៉ាយ។

សមត្ថកិច្ច​បន្ថែមថា អ្នកស្រី ចេ​វ សុ​វ​ឌ្ឍ​នា បាន​ទៅ​ជួល​ផ្ទះ​កន្លែងកើតហេតុ​នៅ​ក្រុង​ដូន​កែវ ដើម្បី​ធ្វើ​អាជីវកម្ម​អស់​ជាច្រើន​ឆ្នាំ​មកហើយ។

មិត្តភក្តិ​ស្និទ្ធស្នាល​របស់​អ្នកស្រី ចេ​វ សុ​វ​ឌ្ឍ​នា នៅតាម​បណ្តាញ​សង្គម​ហ្វេ​ស​ប៊ុ​ក បាន​សម្តែង​ការសោកស្តាយ និង​អាណិតអាសូរ​ជាខ្លាំង ព្រោះ​អ្នកស្រី​ជា​មនុស្ស​មានទឹក​ចិត្តល្អ និង​តែង​ជួយ​រាល់​ទុក្ខ​ធុរៈ​មនុស្ស​ជុំវិញខ្លួន ហើយ​ពួកគេ​ក៏​មិន​នឹកស្មានថា​អ្នកស្រី​គិត​ខ្លី​ធ្វើអត្តឃាត​បែបនេះ​ផងដែរ។

បន្ទាប់ពី​សមត្ថកិច្ច​បា​ន​ពិនិត្យ​សព​រួចរាល់​ហើយ សព​អ្នក សុ​វ​ឌ្ឍ​នា ត្រូវបាន​ប្រគល់ជូន​ក្រុមគ្រួសារ​យកមក​ធ្វើបុណ្យ​តាម​ប្រពៃណី​នៅផ្ទះ​ក្នុង​រាជធានី​ភ្នំពេញ៕

Loading...