ចាប់បញ្ជូន​ជនជាតិ​បារាំង​៣​នាក់​ថតរូប​អាក្រាត​ នៅ​ប្រាសាទបន្ទាយក្តី​ទៅ​តុលាការ

​ខេត្តសៀមរាប ៖ ប៉ូលិស​ទេសចរណ៍​ខេត្តសៀមរាប​បាន​ឲ្យ​ដឹងថា ជនជាតិ​បារាំង​ទាំង​៣​នាក់ ដែល​អាជ្ញាធរ​អប្សរា​ចាប់​ឃាត់ខ្លួន ពាក់ព័ន្ធ​នឹង​ការថតរូប​អាក្រាតកាយ​នៅ​ប្រាសាទបន្ទាយក្តី ក្នុង​រមនីយ៍ដ្ឋាន​អង្គរ​នោះ ត្រូវបាន​បញ្ជូន​ទៅកាន់​សាលាដំបូង​ខេត្តសៀមរាប​ហើយ ដើម្បី​ចាត់វិធានការ​បន្ត​តាមផ្លូវ​ច្បាប់​កម្ពុជា​។​

​លោក​ឧ​ត្ត​ម​សេនីយ៍​ទោ សំ ស៊ី​យ៉ាន អនុប្រធាន​នគរបាល​ទេសចរណ៍​ខេត្តសៀមរាប បាន​ប្រាប់​បណ្តាញ​ព័ត៌មាន​ក្នុងស្រុក​មួយ​ថា ជនសង្ស័យ​ជា​ជនជាតិ​បារាំង​ទាំង​៣​នាក់ ដែលមាន ឈ្មោះ Vincent Henri អាយុ ២០ ឆ្នាំ​, ឈ្មោះ Rodolphe Fourgeot អាយុ ២១ ឆ្នាំ និង​ឈ្មោះ Alexandre Andre Raymond អាយុ ២២​ឆ្នាំ ត្រូវបាន​សម្រេច​បញ្ជូន​ទៅកាន់​សាលាដំបូង​ខេត្តសៀមរាប កាលពី​រសៀល​ថ្ងៃ​សុក្រ​ម្សិលមិញ​។ លោក​ថា រូបអាក្រាត​ដែល​ជនជាតិ​បារាំង​ទាំង​៣​នាក់​ថត​នោះ សមត្ថកិច្ច​រក​មិនឃើញ​ទេ ព្រោះតែ​ពួកគេ​លុបចោល​អស់ ប៉ុន្តែ​យ៉ាងណាក៏ដោយ ដោយយោង​តាម​ចម្លើយសារភាព បាន​បញ្ជាក់ថា ពួកគេ​បាន​ប្រព្រឹត្ត​អំពើ​នេះ​មែន ដូច្នេះហើយ​ទើប​សមត្ថកិច្ច​បញ្ជូន​ពួកគេ​ឡើង​តុលាការ​។​

​រហូតមកទល់​ពេលនេះ សាលាដំបូង​ខេត្តសៀមរាប នៅ​មិនទាន់​ចោទ​ជនជាតិ​បារាំង​ទាំង​៣​នាក់​នោះ​ជា​ផ្លូវការ​នៅឡើយ​ទេ​។​

​សូមបញ្ជាក់ថា ជនជាតិ​បារាំង​ទាំង​៣​នាក់​នេះ ត្រូវបាន​ឃាត់ខ្លួន​កាលពី​វេលា​ម៉ោង​ប្រមាណ​១១ និង​៣០​នាទី ថ្ងៃទី​២៩ មករា កន្លងទៅ ខណៈ​ពួកគេ​ធ្វើ​សកម្មភាព​ថតរូប​អាក្រាត​នៅ​នឹង​បរិវេណ​ប្រាសាទបន្ទាយក្តី ក្នុង​រមណីយដ្ឋាន​អង្គរ​ក្នុង​ខេត្តសៀមរាប​៕​

Loading...

Leave a Reply

Your email address will not be published. Required fields are marked *