ថ្ងៃនេះ ​ថៃបន្ត​រកឃើញ​អ្នក​ឆ្លង​កូ​វីដ​១៩​ថ្មី ​ចំនួន​៥៨​ករណី​ទៀត​

បាងកក ៖ នៅ​ថ្ងៃ​សុក្រ​នេះ​រដ្ឋាភិបាល​ថៃ​បាន​រាយការណ៍​ពី​ករណី​ឆ្លង Covid-19 ថ្មី​ចំនួន៥៨ករណី​បន្ថែមទៀត ក្នុងនោះ​៤៥​ករណី​ជាការ​ឆ្លង​ក្នុងស្រុក និង​១៣​ករណី​ទៀត​ជាការ​នាំចូល​។ ​នេះ​បើ​យោងតាម​ប្រភពពី​កាសែត Bangkok Post​។​

​លោកស្រី Taweesilp Visanuyothin អ្នកនាំពាក្យ​មជ្ឈមណ្ឌល​គ្រប់គ្រង​ស្ថានភាព Covid-19 បាន​និយាយថា​ក្នុងចំណោម​ករណី​ឆ្លង​ក្នុង​ស្រុង​ចំនួន ៤៥​ករណី​ខាងលើ​គឺមាន ២០​ករណី​ត្រូវបាន​រកឃើញ​នៅ​ទីក្រុង​បាងកក​,១៤​ករណី​នៅ​ខេត្ត សាមុត​សាខុន​,៥​ករណី​នៅ​ខេត្ត​សាមុត​ប្រា​កាន​ក្រៅពីនេះ​មាននៅ​ខេត្ត​ផ្សេងៗ​ទៀត​។ ចំណែក​១៣​ករណី​ដែល​នាំចូល​រួមមាន ពី​សហរដ្ឋអាមេរិក (៧) ឥណ្ឌា (២) ហ្វាំ​ង​ឡង់ (១) អេ​មី​រ៉ា​ត​អារ៉ាប់​រួម (១) បែលហ្ស៊ិក (១) និង​ម៉ា​ដា​ហ្គា​ស្ការ (១) ។​

​គួរ​បញ្ជាក់ថា រហូតមកដល់​ពេលនេះ ប្រទេស​ថៃ​បាន​កត់ត្រា​ករណី​ឆ្លង​ជំងឺ COVID-19 សរុប​នៅ​ទូទាំងប្រទេស ២៨.៩៤៧​ករណី ក្នុងនោះ​មាន​អ្នកស្លាប់ ៩៤​នាក់ និង​អ្នកជា​សះស្បើយ​ឡើងវិញ ២៧.៦០៦​នាក់​៕

Loading...