នារីកើតជំងឺកូវីដ១៩ម្នាក់ នាំសង្សារទៅលេងស្រះចិញ្ចឹមត្រី ស្រុកកំពង់ត្រឡាច នៅកំពង់ឆ្នាំង

(កំពង់ឆ្នាំង)៖ នៅយប់ថ្ងៃទី២៤ ខែមីនា ឆ្នាំ២០២១នេះ ចាប់បញ្ជូនស្ត្រីកើតជំងឺកូវីដ១៩ម្នាក់ មកសម្រាកព្យាបាលនៅសណ្ឋាគារ Great Duck បន្ទាប់ពីរូបនាងនាំសង្សារ ទៅលេងស្រះត្រីស្រុកកំពង់ត្រឡាច ខេត្តកំពង់ឆ្នាំង។

យោងតាមអាជ្ញាធរមូលដ្ឋានបានឱ្យដឹងថា នៅថ្ងៃទី២៤ ខែមីនា នេះ ស្ត្រីឈ្មោះ ហីន ចាញ់សុធា អាយុ២៨ឆ្នាំ ដែលមានវិជ្ជមានជំងឺកូវីដ១៩ រស់នៅភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ បាននាំសង្សាររបស់ខ្លួនជាអ្នកខេត្តកែប ទៅលេងស្រះចិញ្ចឹមត្រីរបស់បងស្រីខ្លួន ស្ថិតនៅក្នុងភុមិកំពង់ត្រឡាចក្រោម ឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង។

បន្ទាប់ពីទទួលបានព័ត៌មានសុំកិច្ចសហការពីរាជធានីភ្នំពេញនោះ អាជ្ញាធរស្រុកកំពង់ត្រឡាច និងខេត្តកំពង់ឆ្នាំង សហការជាមួយក្រុមគ្រូពេទ្យចុះពីភ្នំពេញទៅ បាននាំស្ត្រីមានវិជ្ជមានកូវីដ១៩នេះ មកព្យាបាលនៅភ្នំពេញ។ ដោយឡែកបុរសជាសង្សារដាក់ឱ្យធ្វើចត្តាឡីស័កនៅកន្លែងចិញ្ចឹមត្រី ដោយមានការយាមកាមពីកម្លាំងសមត្ថកិច្ច។

បុគ្គលទាំងពីរនាក់នេះ មិនបានទៅជាប់ពាក់ព័ន្ធជាមួយជនដទៃនោះទេ ដោយសារពួកគេបានជិះរថយន្តផ្ទាល់ខ្លួនពីភ្នំពេញ ហើយឆ្ពោះទៅកាន់កន្លែងចិញ្ចឹមត្រីតែម្តង។ បើទោះបីយ៉ាងណា អាជ្ញាធរក៏បន្តស្រាវជ្រាវក្រែងមានអ្នកពាក់ព័ន្ធនឹងបុគ្គលទាំងពីររូបនេះ៕

Loading...