ប្រធានរដ្ឋសភា ប្រគល់អំណោយ ដល់តំណាងរាស្រ្តយកចែកជូនពលរដ្ឋរងគ្រោះធម្មជាតិជំនន់ទឹកភ្លៀង

(ភ្នំពេញ)៖ សម្តេចអគ្គមហាពញាចក្រី ហេង សំរិន ប្រធានរដ្ឋសភា បានប្រគល់ជូនអំណោយរបស់សម្តេច និង សម្តេចធម្មវិសុទ្ធវង្សា សៅ ទី ហេងសំរិន ដែលទទួលបានពីការ ចូលរួម របស់សប្បុរសជនផ្សេងៗ មានដូចជា អង្ករចំនួន ២០០តោន មីចំនួន ២.៨០៨ កេស ទឹកសុទ្ធចំនួន ១,៤០០ កេស និងត្រីខ ចំនួន ១០០ កេស ដល់តំណាងរាស្រ្ត ដើម្បីយកទៅចែកជូនដល់ ប្រជាពលរដ្ឋរងគ្រោះធម្មជាតិ ដោយជំនន់ទឹកភ្លៀង តាម បណ្តាខេត្តមួយចំនួន ដូចជា រាជធានីភ្នំពេញ ខេត្តកណ្តាល កំពង់ស្ពឺ ពោធិសាត់ បាត់ដំបង បន្ទាយមានជ័យ និងខេត្ត ប៉ៃលិន ជាដើមនោះ។

ក្នុងពិធីប្រគល់អំណោយនៅឯគេហដ្ឋានសម្តេច នៅរាជធានីភ្នំពេញ កាលពីព្រឹកថ្ងៃទី១៨តុលា ឆ្នាំ២០២០នេះ សម្តេច អគ្គមហាពញចក្រី ហេង សំរិន បានសម្តែងការសោកស្តាយចំពោះបងប្អូនប្រជាពលរដ្ឋដែលបានបាត់បងអាយុជីវិត ខូចខាតផ្ទះសម្បែង និងទ្រព្យសម្បត្តិ ដោយសារគ្រោះធម្មជាតិជំនន់ទឹកភ្លៀងនិងបានចូលរួមរំលែកទុក្ខ ដ៏ក្រៀមក្រំចំពោះក្រុមគ្រួសារជនរងគ្រោះ ដែល មានសមាជិកបាត់បង់អាយុជីវិតនៅក្នុងគ្រោះធម្មជាតិនេះផងដែរ ។

ក្នុងឱកាសនោះ សម្តេចប្រធានរដ្ឋសភា បានកោតសរសើរដល់តំណាងរាស្រ្តទាំងអស់ ដែលបានខិតខំយកចិត្តទុកដាក់សហការជាមួយកងកម្លាំងគ្រប់លំដាប់ថ្នាក់ អាជ្ញាធរមានសមត្ថកិច្ច និងមន្រ្តីជំនាញពាក់ព័ន្ធ ដើម្បីជួយសង្គ្រោះប្រជាពលរដ្ឋបានទាន់ពេលវេលា នាពេលកន្លងមក និងបានលើកទឹកចិត្តឱ្យបន្តកិច្ចការនេះទៀត រហូតដល់ស្ថានភាពអាកាសធាតុល្អប្រសើរឡើងវិញ ហើយពលរដ្ឋបានវិលត្រលប់ទៅកាន់លំនៅដ្ឋាន ដោយសុវត្ថិភាព។

ក្នុងនាមរដ្ឋសភា និងខ្លួនសម្តេចផ្ទាល់ សម្តេចបានថ្លែងអំណរគុណយ៉ាងជ្រាលជ្រៅចំពោះសប្បុរសជនទាំងអស់ ដែលបានឧបត្ថម្ភដល់រាជរដ្ឋាភិបាល ដើម្បីជួយសង្គ្រោះប្រជាពលរដ្ឋ ដែលកំពុងរងគ្រោះដោយទឹកជំនន់។

សម្តេចប្រធាន មានប្រសាសន៍ថា នោះជាកាយវិការដ៏ប្រពៃនេះបង្ហាញពីវប្បធម៌ចែករំលែក សាមគ្គីភាព និងការរួបរួមគ្នារបស់ប្រជាពលរដ្ឋ ដែលជានិច្ចកាលតែងតែជួយគ្នាទៅវិញទៅមកនៅគ្រប់កាលៈទេសៈ លំបាក គ្រោះអាសន្ន ដូចជាការប្រយុទ្ធប្រឆាំងជម្ងឺកូវីដ-១៩ ជាដើម។

ដោយសារកម្ពុជាអាចប្រឈមនឹងព្យុះ បង្កឲ្យមានភ្ញៀវធ្លាក់បន្ថែមទៀតនៅតំបន់មួយចំនួន រហូតដល់ថ្ងៃទី២១តុលាខាងមុខនោះ ។ សម្តេចអគ្គមហាពញាចក្រី ហេង សំរិន បានលើកទឹកចិត្តដល់តំណាងរាស្រ្ត កងកម្លំាងប្រដាប់អាវុធ អាជ្ញាធរគ្រប់លំដាប់ថ្នាក់ រួមនឹងប្រជាពលរដ្ឋ បន្តសកម្មភាពការពារ អន្តរាគមន៍ និងប្រុងប្រយ័ត្នបន្ថែមទៀត ដើម្បីជញ្ចៀសគ្រោះថ្នាក់ធ្ងន់ធ្ងរ ពីគ្រោះធម្មជាតិនេះ។

សម្តេចបានលើកចិត្តដល់កងកម្លាំងគ្រប់លំដាប់ថ្នាក់ ស្ថាប័នជំនាញគ្រប់ជាន់ថ្នាក់បន្តយកចិត្តទុកដាក់ចំពោះសុវត្ថិភាព ទ្រព្យសម្បត្តិ និងសុខភាពប្រជាពលរដ្ឋ កំពុងស្នាក់នៅទីទួលសុវត្ថិភាពជាបណ្តោះអាសន្ន៕

 

Loading...