An F-15, belonging to the Israeli air force, takes off during the "Blue Flag" multinational air defence exercise at the Ovda air force base, north of the Israeli city of Eilat, on November 8, 2017. / AFP PHOTO / JACK GUEZ

យន្ដហោះចម្បាំងអ៊ីស្រាអែលវាយសន្ធប់ទីតាំងហាម៉ាស នៅតំបន់ហ្គាហ្សា

កងទ័ពអ៊ីស្រាអែលបានប្រកាសថា យន្តហោះចម្បាំងរបស់អ៊ីស្រាអែលបានវាយប្រហារយ៉ាងសន្ធប់ ចូលទីតាំងហាម៉ាស (Hamas) នៅតំបន់ជ្រោយ ហ្គាហ្សាស្ទ្រីប (Gaza Strip) បន្ទាប់ពីគ្រាប់រ៉ុក្កែតច្រើនគ្រាប់ ត្រូវបាញ់ចេញពីទីនោះកាលពីថ្ងៃសុក្រទី ២៦ ខែមិថុនា ឆ្ពោះមកលើទឹកដីអ៊ីស្រាអែល ។ មិនទាន់ដឹងអំពីគ្រោះថ្នាក់ដល់អាយុជីវិត​នៅឡើយទេ ។

ការបាញ់តប់តនេះបានកើតឡើងបន្ទាប់ពីក្រុមហាម៉ាសដែលជាចលនាអ៊ិស្លាមនិយមបានព្រមានថា ការបញ្ចូលជាឧបសម្ព័ន្ធរបស់អ៊ីស្រាអែលលើផ្នែកខ្លះតំបន់វេសប៊ែង (West Bank)នោះគឺជា“ ការប្រកាសសង្រ្គាម” ។

កងទ័ពអ៊ីស្រាអែលបាននិយាយថា យន្ដហោះអ៊ីស្រាអែលបានវាយប្រហារទៅលើទីតាំងឃ្លាំងគ្រាប់រំសេវ និងទីតាំងផលិតគ្រាប់រ៉ុក្កែតនៅភាគខាងត្បូងហ្គាហ្សាស្ទ្រីប ។

ប្រភពសន្តិសុខនៅតំបន់ហ្គាហ្សាបានបញ្ជាក់ប្រាប់ AFP ថា មានការវាយប្រហារនៅតំបន់ Khan Yunis នៅភាគខាងត្បូងទឹកដីប៉ាឡេស្ទីន ដែលមានប្រជាជនចំនួន ២ លាននាក់ ។

នៅក្នុងសេចក្តីថ្លែងការណ៍មួយ យោធាអ៊ីស្រាអែលបាននិយាយថា រ៉ុក្កែត ២ គ្រាប់ត្រូវបានបាញ់ចេញពីតំបន់ហ្គាហ្សាស្ទ្រីបឆ្ពោះទៅទឹកដីអ៊ីស្រាអែល។

នោះជាការបាញ់រ៉ុក្កែតដំបូងបង្អស់ចេញពីតំបន់ហ្គាហ្សាស្ទ្រីប ចាប់តាំងពីដើមខែឧសភាមក ។

សំណើរបស់អ៊ីស្រាអែលដើម្បីបញ្ចូលការតាំងទីលំនៅរបស់ខ្លួននៅតំបន់វេសប៊ែង និងជ្រលងភ្នំហ្ស៊កដានី គឺជាផ្នែកមួយនៃគម្រោងការសន្តិភាពយ៉ាងទូលំទូលាយរបស់សហរដ្ឋអាមេរិក ដែលបានចេញផ្សាយកាលពីខែមករា ។

ក្រុមហាម៉ាស់ និងអ៊ីស្រាអែលបានធ្វើសង្គ្រាមចំនួន ៣ លើកក្នុងរយៈពេលប៉ុន្មានឆ្នាំចុងក្រោយនេះ ។ ជម្លោះចុងក្រោយបង្អស់កើតឡើងក្នុងឆ្នាំ ២០១៤ សម្លាប់ប្រជាជនប៉ាឡេស្ទីនចំនួន ២,២៥១ នាក់និងប្រជាជនអ៊ីស្រាអែលចំនួន ៧៤ នាក់។

មិនមានទំនាក់ទំនងផ្លូវការរវាងភាគីទាំងពីរទេ។ អាជ្ញាធរប៉ាឡេស្ទីនដែលជារដ្ឋបាលដាច់ដោយឡែកមួយ មានមូលដ្ឋាននៅតំបន់ West Bank បានកាត់បន្ថយកិច្ចសហប្រតិបត្តិការជាមួយអ៊ីស្រាអែលកាលពីខែមុន ៕ ថាច់ យ៉ាត

Loading...