លោក សាយ សំអាល់ ៖ ការ​ប្រែប្រួល​អាកាសធាតុ គឺជា​ការ​គំរាម​​គំហែង​ចម្បង​មួយ​​នា​ពេល​​បច្ចុប្បន្ន និង​អនាគត​​សម្រាប់​​មនុស្សជាតិ

រដ្ឋមន្ត្រី​ក្រសួងបរិស្ថាន និង​ជា​ប្រធាន​គណៈកម្មការ​ជាតិ​គ្រប់គ្រង​ការ​ប្រែប្រួល​អាកាសធាតុ ឯកឧត្តម សាយ សំ​អាល់ មាន​ប្រសាសន៍​ថា ការ​ប្រែប្រួល​អាកាសធាតុ​គឺជា​ការ​គំរាមកំហែង​ចម្បង​មួយ​នា​ពេល​បច្ចុប្បន្ន និង​ពេល​អនាគត​សម្រាប់​​មនុស្សជាតិ​ទាំងមូល ជា​ពិសេស​សម្រាប់​ប្រទេស​ក្រីក្រ ដែល​មាន​សេដ្ឋ​ពឹង​អាស្រ័យ​ដោយ​ផ្ទាល់​លើ​អាកាស​ធាតុ​។ នេះ​ជា​ការ​លើក​ឡើង​ក្នុង​ពិធី​បើក​សិក្ខាសាលា​ផ្សព្វផ្សាយ​លទ្ធផល​ស​ន្និ​សិ​ទ​លើក​ទី ២០ នៃ​បណ្តា​ភាគី អនុ​សញ្ញា​ក្របខ័ណ្ឌ​សហប្រជាជាតិ​ស្តី​ពី​ការ​ប្រែប្រួល​អាកាសធាតុ នៅ​ព្រឹក​ថ្ងៃ​ទី ៣ ខែ មីនា នៅ​សណ្ឋាគារ​សាន់​វ៉េ​។

ឯកឧត្តម​បន្ថែម​ថា ការ​ប្រែប្រួល​អាកាសធាតុ​គឺជា​លទ្ធផល​នៃ​បរាជ័យ​ទីផ្សា​ដ៏​ធំធេង​នា​ពេល​បច្ចុប្បន្ន​។ ការ​ប្រើប្រាស់​យ៉ាង​ខ្ជះខ្ជាយ​នូវ​បរិយាកាស​ពិភពលោក​ដែល​ជា​សម្បត្តិ​រួម ការ​រីកសាយ​យ៉ាង​លឿន​នូវ​វប្បធម៌​ប្រើប្រាស់​និយម ជា​មូលហេតុ​ចម្បង​មួយ​នៃ​បញ្ហា​នេះ​។

ឯកឧត្តម​បន្ដ​ថា ពិតមែនតែ​កម្ពុជា មាន​អាទិភាព​អភិវឌ្ឍន៍​ចំពោះ​មុខ​ច្រើន ហើយ​សមត្ថភាព និង​ធនធាន​មាន​កម្រិត​ក្តី ក៏​រាជរដ្ឋាភិបាល​នៅ​តែ​មាន​ឆន្ទៈ​នយោបាយ​ខ្ពស់ ក្នុង​ការ​ត្រៀមខ្លួន​រួមចំណែក​ដោះស្រាយ​បញ្ហា​ប្រែប្រួល​អាកាសធាតុ ដោយ​ឈរ​លើ​ស្មារតី​នៃ​គោលការណ៍ អនុវត្ត​អនុសញ្ញា​ប្រែប្រួល​អាកាសធាតុ​។

ជាមួយ​គ្នា​នោះ ឯកឧត្តម ទី សុគន្ធ រដ្ឋលេខាធិការ​ក្រសួងកសិកម្ម រុក្ខា​ប្រមាញ់ និង​នេសាទ មាន​ប្រសាសន៍​ថា ការ​ប្រែប្រួល​អាកាសធាតុ គឺជា​លទ្ធផល​នៃ​សកម្មភាព​របស់​មនុស្ស ដែល​បញ្ហា​នេះ​ត្រូវ​បាន​ពិភពលោក​ទទួលស្គាល់​ជា​បញ្ហា​សកល​។

ឯកឧត្តម​បន្ថែម​ថា កំណើន​កំហាប់​ឧស្ម័ន​ផ្ទះ​កញ្ចក់ នៅ​បរិយាកាស បាន​ធ្វើ​ឲ្យ​កើន​កម្ដៅ​នៅ​លើ​ផែនដី​ដែល​ជា​មូល​ហេតុ​ចម្បង​នៃ​ការ​ប្រែប្រួល​អាកាសធាតុ​ជា​រួម​របស់​ភព​ផែន​ដែរ​។

សូម​ជម្រាប​ថា បញ្ហា​ដែល​ប្រឈម​ក្នុង​ការ​អភិវឌ្ឍ​វិស័យ​កសិកម្ម ក​សិ​ឧ​ហ្សា​ហ​កម្ម កៅស៊ូ របប​ទឹកភ្លៀង គ្រោះ​ទឹកជំនន់ គ្រោះ​រាំង​ស្ងួត រញ្ជួយ​ដី ជា​ការ​បម្រែបម្រួល​អាកាសធាតុ​។ តាម​របាយការណ៍ របស់​គណៈកម្មការ​ជាតិ​គ្រប់គ្រង​គ្រោះ​មហន្តរាយ​បង្ហាញ​ថា ក្នុង​ឆ្នាំ ២០១៣ គ្រោះ​ទឹកជំនន់​បាន​បណ្តាល​ឲ្យ​កម្ពុជា​បាត់បង់​មនុស្ស ១៦៨​នាក់ ខូចខាត់​ផលដំណាំ ហេដ្ឋារចនាសម្ព័ន្ធ​ជា​ច្រើន​គិត​ជា​ទឹកប្រាក់​អស់​ប្រមាណ ៣៥៦ លាន​ដុល្លា​អា​មេ​រិ​ក​៕

Loading...

Leave a Reply

Your email address will not be published. Required fields are marked *