ឧត្តមគតិខ្មែរ លឿន រហ័ស អាចទុកចិត្តបាន
ខេត្តព្រះវិហារ៖ លោក ប្រាក់ សុវណ្ណ អភិបាលនៃគណៈអភិបាលខេត្តព្រះវិហារ នាព្រឹកថ្ងៃពុធ ទី៦ ខែមករា ឆ្នាំ២០២១នេះ បានដឹកនាំមន្ដ្រីរាជការជុំវិញខេត្ត ធ្វើពិធីបួងសួងសុំសេចក្ដីសុខ សេចក្ដី ចម្រើនជូនដល់ប្រជាពលរដ្ឋនៅទូទាំងខេត្ត និងឱ្យជៀសផុតពីជំងឺដង្កាត់ផ្សេងៗ។
ពិធីនេះប្រព្រឹត្តិទៅនៅមុខរូបសំណាកលោកតាឌី ស្ថិតក្នុងភូមិហ្មសែត សង្កាត់ប៉ាលហាល ក្រុងព្រះវិហារ ខេត្តព្រះវិហារ ដោយមានការចូលរួមពីសំណាក់ឯកឧត្តម លោកជំទាវ សមាជិកក្រុម ប្រឹក្សាខេត្ត អភិបាលរងខេត្ត មេបញ្ជាការកងកម្លាំងទាំងបី ថ្នាក់ដឹកនាំមន្ទីរអង្គភាពនានាជុំវិញខេត្ត ព្រមទាំងមន្ដ្រីរាជការអាជ្ញាធរគ្រប់លំដាប់ថ្នាក់។
ពិធីបួងសួងមានការរៀបចំថ្វាយជូនភ្លេងពិណពាទ្យ និងគ្រឿងសក្ការៈបូជាជាច្រើនមុខផងដែរ ដើម្បីឧទ្ទិសដល់បារមីលោកតាឌីដែលជាមេទ័ពធំជំនាន់ដើមដែលមានបារមីខ្លាំងពូកែ ក្នុងការដឹកនាំទ័ពប្រយុទ្ធលើសមរភូមិ ដែលប្រជាពលរដ្ឋក៏ដូចជាថ្នាក់ដឹកនាំ មន្ដ្រីរាជការដែលមានជំនឿតែងមកបន់ស្រន់តាមបំណងប្រាថ្នារៀងខ្លួនគ្រប់រដូវកាល។
ក្នុងពិធីនេះផងដែរឯកឧត្តមអភិបាលខេត្ត ថ្នាក់ដឹកនាំជុំវិញខេត្ត បានបួងសួងដល់ព្រះរតនត្រ័យ និងបារមីនៃវត្ថុស័ក សិទ្ធថែរក្សាភ្នំត្បែង សូមជួយថែរក្សា ឃុំគ្រង និងប្រទានពរជ័យ សិរីមង្គល បវរមហាប្រសើរ ជូនដល់ថ្នាក់ដឹកនាំ មន្ដ្រីរាជការ កងកម្លាំងប្រដាប់អាវុធ ព្រមទាំងប្រជាពលរដ្ឋនៅទូទាំងខេត្តព្រះវិហារ និងដើម្បីឧទ្ទិសកុសលផលបុណ្យទាំងឡាយជូនដល់បុព្វការីជនមានយុទ្ធជន យុទ្ធនារី ដែលបានបូជាសាច់ស្រស់ ឈាមស្រស់ ក្នុងបុព្វហេតុរំដោះជាតិមាតុភូមិឱ្យឆ្លងផុតពីភពខ្មៅងងិត និងសង្គ្រាមរ៉ាំរ៉ៃអស់កាលជាយូរឆ្នាំ រហូតធ្វើឱ្យប្រទេសជាតិមានសុខសន្ដិភាព និងការអភិវឌ្ឍន៍រីកចម្រើនលើគ្រប់វិស័យរហូតមានអ្វីៗគ្រប់យ៉ាងដូចសព្វថ្ងៃនេះ៕
