NASA ចុះកិច្ចព្រមព្រៀងជាមួយក្រុមហ៊ុនឯកជន នាំអវកាសយានិក​ទៅភព​ព្រះចន្ទ

ទីភ្នាក់ងារ​អវកាស​សហរដ្ឋអាមេរិក ហៅកាត់ថា ណាសា (NASA) បានចុះកិច្ចព្រមព្រៀង​ជាមួយក្រុមហ៊ុនឯក​ជន​ចំនួន​៣​​​ឲ្យអភិវឌ្ឍ, ផលិត និង​បង្ហោះយាន lunar landers នាំយកអវកាសយានិក​ទៅកាន់ ភពព្រះចន្ទ​នៅ​ក្នុងឆ្នាំ​២០២៤ ហើយអាចនឹងទៅកាន់​ភពព្រះអង្គារ​ផងដែរ ។ 

ប្រភពព័ត៌មាន AP បានផ្សាយនៅថ្ងៃទី​១ ខែឧសភា​ ឆ្នាំ២០២០ថា អ្នកគ្រប់គ្រង​អង្គការ ណាសា Jim Bridenstine បានប្រកាស​កាលពីថ្ងៃ​ទី​៣០ ខែមេសា ឆ្នាំ២០២០ថា ក្រុមហ៊ុន​ចំនួនបី នឹងអភិវឌ្ឍ ផលិត និងហោះហើរ​ lunar landers ដោយគោលបំណង​នាំ​អវកាសយានិក​ត្រឡប់​ទៅឋានព្រះចន្ទវិញ​ នៅក្នុងឆ្នាំ២០២៤ ហើយអាចទៅ​កាន់​ភពព្រះអង្គារ​ផងដែរ ។ 

ក្រុមហ៊ុនឯកជនទាំងបីដែលទទួលបានសិទ្ធិ​នោះ​រួមមាន ក្រុមហ៊ុន SpaceX នៅទីក្រុង Hawthorne​រដ្ឋ California ដឹកនាំដោយលោក Elon Musk ។ ក្រុមហ៊ុន Blue Origin នៅទីក្រុង Kent រដ្ឋ វ៉ាស៊ីនតោន ដឹកនាំដោយស្ថាបនិកAmazon លោក Jeff Bezos និងក្រុមហ៊ុន Dynetics នៅទីក្រុង Huntsville រដ្ឋ Alabama ដែលជាក្រុមហ៊ុនបុត្រសម្ពន្ធ Leidos ។ កិច្ចព្រមព្រៀងនេះ ​មានរយៈពេល​១០ខែ សរុប​ទឹកប្រាក់​ចំនួន ៩៦៧​លានដុល្លារអាមេរិក ។ 

លោក Bridenstine បានថ្លែងថា «នេះជាចំណុចចុងក្រោយ​ដែលយើង​ត្រូវការ​ដើម្បី​ឡើង​ទៅដល់​ឋានព្រះចន្ទ​ នៅក្នុងឆ្នាំ២០២៤» ។ លោកបានតក់សម្គាល់ថា នោះជា​ការ​ទៅដល់ឋានព្រះចន្ទ​ដំបូង​បំផុត​​​ ចាប់តាំងពី​ដែលដែលយាន ​Apollo បេសកកម្ម​ទៅឋាន​ព្រះចន្ទ​ក្នុងឆ្នាំ១៩៧២ ។ 

ក្នុងរយៈពេល​១០ខែ​ខាងមុខទៀតនេះ ក្រុមហ៊ុននីមួយៗ​នឹង​សម្រិតសម្រាំង​ការងារ​របស់​ខ្លួន ហើយអង្គការណាសា​ជាអ្នកសម្រេចចិត្តថា តើយាន​មួយណា​ដែលត្រូវធ្វើតេស្ត​មុនដំបូងគេ ។ លោក Bridenstine បានបញ្ជាក់ថា NASA នឹងទៅជាមួយក្រុមហ៊ុនណាមួយនោះ បន្ទាប់ពី​ទទួលបាននូវ​ឱកាស​ជោគជ័យ​ខ្ពស់​ជាងគេក្នុងឆ្នាំ២០២៤។ 
អង្គការណាសានឹងពឹងផ្អែកលើផ្កាយរណប Orion ផ្ទាល់ខ្លួន និងរ៉ុក្កែតប្រព័ន្ធអវកាសធំដែលស្ថិតនៅក្នុងការអភិវឌ្ឍនោះ ដើម្បីបាញ់បង្ហោះអវកាសយានិក ទៅកាន់ភពព្រះច័ន្ទ។

ក្រុមហ៊ុនពីរផ្សេងទៀត គឺក្រុមហ៊ុន ប៊ូអ៊ីង និង Vivace បានដាក់សំណើដេញថ្លៃដែរ ប៉ុន្តែ​ត្រូវជម្រុះចោលមុនកំណត់ ដោយមានតែក្រុមហ៊ុន៣ខាងលើប៉ុណ្ណោះ​បានចុះកិច្ចសន្យា ។ ក្រុមហ៊ុន Blue Origin ទទួលបានច្រើនជាងពាក់កណ្តាលចំនួនទឹកប្រាក់សរុប ៥៧៩ លានដុល្លារ ពោលគឺច្រើនជាងបួនដង​ទឹកប្រាក់​ក្រុមហ៊ុន SpaceX ទទួលបានតែ ១៣៥ លានដុល្លារ និងក្រុមហ៊ុន Dynetics ទទួលបានចន្លោះពី​២៥៣លានដុល្លារ ៕

Loading...